Ep 4: ધીરે-ધીરે મોતના મુખમાં સરી રહેલા દેવને જોઈ અમિતને પોતાનો ડર સાચો પડતો દેખાઈ રહ્યો હતો
સમાચાર વીડિયો ના વિડીયોને સબસ્ક્રાઈબ કરો
દેવને કીમોથેરાપીનો ત્રીજો ડોઝ ૧૮ માર્ચ ૨૦૧૬ના દિવસે આપવાનો હતો, પરંતુ સેકન્ડ ડોઝ અપાયા બાદ અમિતની ચિંતા સતત વધી રહી હતી. દેવનું વજન દિવસેને દિવસે ઓછું થઈ રહ્યું હતું, અને માથાના વાળ પણ ઓછા થવા લાગ્યા હતા. ત્રીજો ડોઝ આપવાનો દિવસ નજીક આવ્યો ત્યાં સુધીમાં તો દેવની હાલત એવી થઈ ગઈ હતી કે તેના માટે એક ચમચી પાણી ગળા નીચે ઉતારવું પણ લગભગ અશક્ય થઈ ગયું હતું. આ દરમિયાન તેને ઘણીવાર હોસ્પિટલે લઈને પણ દોડવું પડ્યું હતું, અમિત તે વખતે કોઈની સાથે પોતાના મનમાં જે ચાલી રહ્યું હતું તે શેર કરી શકવાની સ્થિતિમાં નહોતો.. દેવની હાલત જોઈને અમિતને એમ જ હતું કે કીમોના ચાર ડોઝ પૂરા થાય તે પહેલા જ કદાચ તેનો દીકરો આ દુનિયા છોડી જશે. અમિત ખૂબ જ પ્રેક્ટિલ માણસ હતો, તેનામાં હિંમત તો ઘણી હતી પણ જ્યારે સગા દીકરા સાથે આવું કંઈક થાય ત્યારે સ્વાભાવિક છે કે ગમે તેટલા કઠોર હ્રદયના માણસનો કોન્ફિડન્સ પણ ડગમગી જાય. અમિત ત્યારે દેવની સાથે-સાથે પાયલને અને પોતાની જાતને પણ સંભાળી રહ્યો હતો. આખો દિવસ તે અને પાયલ દેવને કંઈક ખાઈ લેવા માટે મનાવતા રહેતા, પણ દેવ તો પાણી પી શકે તેવી હાલતમાં પણ નહોતો રહ્યો. તે છોકરાના સૂકાઈ ગયેલા ચહેરા, ઉંડી ઉતરી ગયેલી આંખો અને ફાટી ગયેલા હોઠ કોઈને પણ કંપારી છોડાવી દે તેવું દ્રશ્ય ઉભું કરતા હતા, પણ અમિત જરાય હિંમત હાર્યા વિના સંજોગો સામે લડી રહ્યો હતો.