Ep 1: એક સુખી-સંપન્ન પરિવારની માંડ ૧૬ વર્ષની દીકરીની એક દર્દનાક લવસ્ટોરી
પ્રેમ એટલે શું? આ સવાલ ઘણો પેચીદો છે, અને તેનો જવાબ આપવો પણ કદાચ સરળ નથી. પ્રેમને કોઈ આંધળો કહે છે, અને કોઈના પ્રેમમાં પડી જનારાને આ દુનિયા પાગલ પણ કહે છે. પોતાના પ્રેમને પામવા માટે કોઈ વ્યક્તિ ગમે તેવો ભોગ આપવા તૈયાર થઈ જાય છે, તો કોઈ પ્રેમને ના પામી શકે તો આ દુનિયાને જ છોડવા તૈયાર થઈ જાય છે. જેને પોતાના પ્રેમની પ્રાપ્તિ થઈ જાય તે પોતાને દુનિયાની સૌથી ખુશનસીબ વ્યક્તિ ગણે છે, પરંતુ તેનાથી જે વંચિત રહી જાય તે આખી જિંદગી માથે હાથ દઈને રડતો છે. જોકે, દરેક પ્રેમ કહાનીનો અંત તેની શરૂઆત જેટલો લાગણીશીલ નથી હોતો, અને આવી જ એક પ્રેમકહાની છે પૂનમ અને પરવેઝની. નામ પરથી જ આપ સમજી ગયા હશો કે આ લવસ્ટોરી એક હિન્દુ યુવતી અને મુસ્લિમ યુવકની છે, પરંતુ આ લવસ્ટોરીને આજકાલ જે શબ્દનો લોકો વગર કંઈ લાંબુ વિચારે બેફામ ઉપયોગ કરે છે તેવા ‘લવ જેહાદ’ સાથે કોઈ ન્હાવા-નિચોવવાનો પણ સંબંધ નહોતો. આ લવસ્ટોરીની શરૂઆત ત્યારે થઈ હતી જ્યારે ફેસબુક કે પછી ઈન્સ્ટાગ્રામ જેવા સોશિયલ મીડિયા પ્લેટફોર્મ્સનો જન્મ પણ નહોતો થયો, પણ હા.. પૂનમ અને પરવેઝને મળાવવામાં ઈન્ટરનેટનો હાથ તો ચોક્કસ હતો. તે વખતે પૂનમની ઉંમર માંડ ૧૬ વર્ષની આસપાસ હતી, રાજકોટમાં રહેતી પૂનમે હજુ તો બારમું ધોરણ જ પાસ કર્યું હતું અને કોલેજ જવાના તે સપનાં જોઈ રહી હતી. પૂનમની ફેમિલીમાં બધા ૧૦ થી ૬ની જોબ કરતા સરકારી નોકરિયાત હતા, પરંતુ પૂનમનું સપનું ભણી-ગણીને કંઈક અલગ કરવાનું હતું. તે નાનપણથી જ છોકરી સાથે નહીં પણ છોકરા સાથે રમીને મોટી થઈ હતી અને તેની પર્સનાલિટી પણ ટોમ બોય જેવી જ હતી, દસમા ધોરણ સુધી બોયકટ વાળ રાખનારી પૂનમ ત્યારસુધી તો એક છોકરાની જેમ જ રહી હતી પરંતુ કોલેજ જવાની ઉંમરે જાણે તેની અંદર સુષુપ્ત અવસ્થામાં રહેલી એક સ્વરૂપવાન કન્યા જાગૃત થઈ હતી.
Authored byCurated byનવરંગ સેન|TimesXP Gujarati|18 Sept 2023